منتديات كلداني

ثقافي ,سياسي , أجتماعي, ترفيهي
 
الرئيسيةالرئيسيةبحـثالكتابة بالعربيةمركز  لتحميل الصورالتسجيلدخول
 رَدُّنا على اولاد الزانية,,لقراءة الموضوع اكبس على الصورة  رأي الموقع ,,لقراءة الموضوع اكبس على الصورة
رَدُّنا على اولاد الزانية,,لقراءة الموضوع اكبس على الصورةقصة النسخة المزورة لكتاب الصلاة الطقسية للكنيسة الكلدانية ( الحوذرا ) والتي روّج لها المدعو المتأشور مسعود هرمز النوفليالى الكلدان الشرفاء ,,لقراءة الموضوع اكبس على الصورةملف تزوير كتاب - ألقوش عبر التاريخ  ,,لقراءة الموضوع اكبس على الصورةمن مغالطات الصعلوگ اپرم الغير شپيرا,,لقراءة الموضوع اكبس على الصورةدار المشرق الغير ثقافية تبث التعصب القومي الاشوري,,لقراءة الموضوع اكبس على الصورة

شاطر | 
 

 العيد الوطني العراقي

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
maria
عضو متألق
عضو متألق







البلد البلد : العراق
الجنس : انثى
عدد المساهمات عدد المساهمات : 1150
التوقيت الان بالعراق :
تاريخ التسجيل : 07/05/2009
مزاجي : اكل شوكولاتة

مُساهمةموضوع: العيد الوطني العراقي   2011-02-26, 10:57 pm

العيد الوطني



رغم كلشي ,اليوم كان واحد من اهم ايام حياتي , وبالنسبة الي هذا اليوم هو العيد الوطني , يمكن لان هاي اول مرة اسمع بيها الشعب العراقي , يكول اني الشعب العراقي , ويمكن هاي اول مرة الشعب العراقي يقول للحكومة اني الشعب العراقي , المالكي توسل بينا منروح لساحة التحرير , وتوسط المرجعيات وشيوخ العشائر وابراهيم الجعفري حتى منروح ونكول احنا الشعب العراقي , طبعا مثل ما شفتوا احنا لبسناه وطلعنا , سوى حظر تجوال للمركبات , احنا طلعنا , سوى يوم الجمعة دوام , احنا طلعنا , قطع الطرقات ونشر القوات واحنا طلعنا ,,سد علينا الشوارع المؤدية لساحة التحرير, بس احنا وصلنا , صح تعبنا ومسافات طويلة , بس وصلنا , ويمكن كلكم شفتونا شلون شعب راقي . وشفتوا شبابنا رغم كل الظروف القاسية شلون شباب راقي ,,,والله ما اعتدينا, واسالوا الجيش مو كلهم سلمنا عليهم وبوسناهم , مو هتفنا للشرطة احنا اخوانكم , مو صحنا سلمية , سلمية ,,, بس شنسوي للمالكي اذا هو مو راقي , شنسويلة اذا هو متخلف ومع الاسف , مع شديد الاسف , كذاب ,,, وهاي راي الشعب العراقي وانتوا سمعتوهم , كلهم كانوا يهتفون : كذاب نوري المالكي كذاب , واني من هذا اليوم بعد ما اعترف بنوري المالكي ولا يشرفني ان اسميه دولة رئيس الوزراء, لان صدك طلع كذاب , تتذكرون من كال بالانتحابات الماضية اطلعوا واتحدوا الارهاب , وجان يكول العراقيين ميخافون ويتحدون الموت بصدورهم , واليوم يكول لتطلعون اخاف عليكم من الارهاب , كذاب ,,, ابو اسراء اكبر كذاب ,,,وهذا الكذاب من شافنا قلب على قلب ومتحابين ونهتف سوى , مات من الخوف ونزل قوات مكافحة الارهاب والالوية التابعة لمكتب االقائد العام ,,,رشوا علينا الماي ,,, ضحكنا , وطيرت علينا المروحيات غبار الشوارع النظيفة , هم ضحكنا ,,, ابو اسراء ميعرف الماي ماينا والتراب ترابنا ,,,طار عقله وقرر يطلق علينا قنابر الصوت ,,, احنا متنا من الضحك ,,, ابو اسراء عليمن قنابر الصوت , انت تدري من جنت تدرس بالخارج , احنا وراك شكد شفنا كروزات وشكد عزفت فوك روسنا ال(بي ففتي تو ) , شكد شفنا صورايخ وقاذافات وهوانات ومدافع وطائرات ,,, اكيد انت متدري , لك والله احنا شفنا مصايب ما مرت على شعب ثاني , تريدنا نخاف من قنابر الصوت ,, والله ضحكتني ابو اسراء , وبعدين انت طلعت مو ديمقراطي ,اول اشوف واحد هم كذاب وهم مو ديمقراطي , ليش منعت الفضائيات , ليش تخاف من الفضائيات , ترى احنا لمعلوماتك منريد الفضائيات , شنو قابل احنا مطربين حتى ندور فضائيات , اصلا ااحنا نحب الستر ونكره الشهرة , بس انت الوحيد من تسوي مؤتمر وتريد تكذب تعزم كل الفضائيات , حلال عليك وحرام علينا , مع ذلك احنا اليوم كنا تحت سماء العراق الرحيمة ,,تحت رحمة الله , وانت خاتل ورا صبات الكونكريت , خاتل ومرعوب وتسمع صوتنا واحنا نهتف : كــــذاب نوري المالكي كذاب ,,,طبعا ادري انت متت من الرعب وادري بيك ترجف من الخوف , وحولك شلة المذعورين ضحكوا عليك ابو اسراء ورطوك بدمنا,,, اي انت تورطت بدمنا ابو اسراء,,, قواتك المقربة تورطت بدم شبابنا ودم شبابنا غالي ,, واجهتنا بالرصاص الحي وسقط الورد من ايد بناتنا , ونزلت دموع امهاتنا , دمعت عيون الشوارع والارصفة والساحات , النخل والاشجار والبنايات كلها نزلت دموعها علينا , ملائكة السماء صاحت عليك : لا ,,, حرام عليك , انوب انت عليهم , مو كافي الارهاب والميلشيات حصدت اعمارهم ,, انوب انت عليهم ليش مو خطية , مو نصهم انتخبوك عبالهم رجال وتحترم دمهم , ليش خربت عيدنا الوطني وليش سرقت فرحتنا. احنا شمسوين , شفتنا حركنا بناية , شفتنا خربنا شارع, شفت ويانا مندسين , شفت بعثيين , شفت ماجورين وقابضين ثمن من دول الجوار , اي وينه الثمن جان بين علينا ,, ليش تطلق الرصاص الحي , احنا شرايدين , والله ما طالبين شي , شوية ماي وكهرباء وحصة تموينية ولا تسرقون فلوس الفقراء , شطالبين اكثر من هذا , ليش تطلق علينا الرصاص الحي ,, احنا عبالنا انت مثل ابونا وراح تسمعنا شنريد , بس للاسف بدل مل تسمعنا ,,, تورطت بدمنا , وللاسف يا ابو اسراء صار بينا وبينك الدم , وانت سمعتنا واحنا نهتف بالروح بالدم نفديك يا عراق ,, وهاي اول مرة بحياتنا نهتف للعراق مو للقائد العام ,,,انت ماقصرت , سرقت الهتاف من حناجرنا وسفكت دمنا على ارض العراق وبساحة التحرير , الله كريم با ابو اسراء ,,, وموعدنا ساحة التحرير,


الرجوع الى أعلى الصفحة اذهب الى الأسفل
 
العيد الوطني العراقي
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
منتديات كلداني  :: 

أخر المقالات والأخباروالأحداث العامة على الساحة :: مقالات والاخبار من العراق

-
انتقل الى: